Útlendingastofnun hefur sent frá sér yfirlýsingu þar sem fram kemur að starfsmaður stofnunarinnar sem braut lög um persónuvernd og þagnarskyldu opinberra starfsmanna hafi „lokið störfum hjá stofnuninni“.

Í yfirlýsingunni segir að þann 18. desember hafi Útlendingastofnun fengið upplýsingar um alvarlegt brot starfsmanns stofnunarinnar á lögum, en það var þegar blaðamaður Gímaldsins hafði samband vegna skjáskota sem hann hafði undir höndum og sýndu að starfsmaðurinn hafði deilt nöfnum skjólstæðinga stofnunarinnar á Instagram. 

Gímaldið sendi Útlendingastofnun fyrirspurn vegna málsins í gær og í svarinu kemur fram að það liggi fyrir að upplýsingarnar voru birtar á samfélagsmiðlum áður en einstaklingunum sjálfum var tilkynnt um ákvarðanir stofnunarinnar í málum þeirra.

Sjá einnig: Starfsmaður Útlendingastofnunar birti nöfn skjólstæðinga á Instagram

„Frá því málið kom upp hefur verið farið yfir allar ákvarðanir sem viðkomandi starfsmaður hafði aðkomu að á meðan hann starfaði hjá stofnuninni. Þetta var gert til að ganga úr skugga um að verkferlum sem eiga að tryggja gæði ákvarðana hafi verið fylgt í hvívetna. Á meðal þess sem það felur í sér er að allar stjórnvaldsákvarðanir stofnunarinnar skuli lesnar yfir og staðfestar af yfirmanni og því komi ávallt fleiri en einn starfsmaður að hverri ákvörðun. Við yfirferð umræddra mála kom ekkert fram sem gefur tilefni til að endurskoða eða taka upp að nýju ákvarðanir sem starfsmaðurinn hafði aðkomu að. Ekkert bendir heldur til þess að viðkomandi hafi áður viðhaft slíka háttsemi og gengur stofnunin út frá því að um einangrað tilvik sé að ræða,“ segir í yfirlýsingu Útlendingastofnunar. 

Þar kemur einnig fram að í ljósi alvarleika málsins hafi Útlendingastofnun einnig tilkynnt brot starfsmannsins til lögreglu.

„Ég vil vera skýr um að brot á trúnaði verða ekki liðin innan stofnunarinnar.“ – forstjóri Útlendingastofnunar

Í yfirlýsingunni er haft eftir Kristínu Völundardóttur, forstjóra Útlendingastofnunar: „Ég geri þá kröfu að starfsfólk Útlendingastofnunar standi undir þeirri ábyrgð sem fylgir meðhöndlun viðkvæmra persónuupplýsinga. Traustið sem skjólstæðingar okkar sýna okkur byggir á því, og ég vil vera skýr um að brot á trúnaði verða ekki liðin innan stofnunarinnar.“ 

Þá segir þar ennfremur að í samvinnu við persónuverndarfulltrúa stofnunarinnar hafi brotið verið tilkynnt sem öryggisbrestur til Persónuverndar og hafi ákvæðum um meðferð slíkra mála verið fylgt til hins ítrasta. Persónuvernd hefur jafnframt hafið frumathugun á öryggi við vinnslu persónuupplýsinga hjá Útlendingastofnun í því skyni að afla upplýsinga og gagna til athugunar á því hvort tilefni sé til að hefja úttekt eða frumkvæðisathugun á vinnslunni.

Útlendingastofnun tekur fram að stofnunin hafi við þetta tilefni brýnt fyrir starfsfólki sínu mikilvægi þess að gæta ítrustu varkárni við meðhöndlun þeirra gagna sem stofnuninni er treyst fyrir. Stofnunin muni hér eftir sem hingað til leggja áherslu á að upplýsa og fræða starfsfólk sitt um rétta meðferð gagna og þær skyldur sem hvíla á starfsmönnum samkvæmt lögum og reglum.

Birtist á Instagram áður en fólkinu var tilkynnt um ákvörðunina

Gímaldið sendi Útlendingastofnun fyrirspurn í gær vegna málsins og óskaði meðal annars svara við því til hvaða afleiðingar brotin hefðu haft fyrir viðkomandi starfsmann. 

Þá spurði Gímaldið einnig um þá einstaklinga sem voru nafnbirtir á skjáskotunum:

– Var haft samband við þá og þeim tilkynnt að starfsmaður Útlendingastofnunar hefði brotið trúnað við meðferð mála þeirra ?

– Liggur fyrir – eða er til skoðunar – hvort nöfn þeirra, ásamt upplýsingum að þeir hefðu fengið synjun, birtust á samfélagsmiðlum áður en þeim sjálfum var tilkynnt um synjunina?

– Verða mál þeirra séu tekin upp aftur í ljósi trúnaðarbrots við málsmeðferð þeirra innan stofnunarinnar?

Í svari Útlendingastofnunar til Gímaldsins, sem innihélt vísun í yfirlýsinguna á vef stofnunarinnar sem birt var fyrr í dag, stóð ennfremur: „Aðeins birtist fullt nafn eins einstaklings á myndunum og hefur sá aðili verið upplýstur um trúnaðarbrotið. Það liggur fyrir að upplýsingarnar voru birtar á samfélagsmiðlum áður en einstaklingunum sjálfum var tilkynnt um ákvarðanirnar. Mál þeirra, og allra annarra sem starfsmaðurinn hefur haft aðkomu að, hafa verið yfirfarin með tilliti til þess hvort verkferlum stofnunarinnar sem eiga að tryggja gæði ákvarðana, hafi verið fylgt í hvívetna. Ekkert kom fram sem gefur tilefni til að endurskoða eða taka upp að nýju ákvarðanir sem starfsmaðurinn hafði aðkomu að.“