Fjölmiðillinn Gímaldið er kominn í loftið. Ákvörðun um stofnun hans var tekin í lok júlí, í sólskini og fífldirfsku, eftir að við, Eyrún Magnúsdóttir og Auður Jónsdóttir, hittumst í kaffibolla. Kannski var kaffið aðeins of sterkt en einhvern veginn virtist gáfulegra að stofna fjölmiðil en eingöngu hlaðvarp til að múlbinda ekki möguleikana. En fjölmiðill er kröftugt orð – og orðinu hafði ekki fyrr verið sleppt lausu en við tók heilmikil hugmyndavinna vikum og mánuðum saman. Stundum verða hlutirinir til um leið og þeir gerast. 

Í upphafi var það hvatning að hugsa um söguna af naglasúpunni. Um flæking sem kom í þorp, bað um vatn og setti nagla í það tl að sjóða súpu; síðan söfnuðust þorpsbúar í kringum hann með hina og þessa matarbita þar til úr varð súpa sem nærði marga. 

Þannig var bara byrjað á því að sjóða vatnið – og sjá hvort fólk myndi svo taka þátt í eldamennskunni.. 

Og já! Sjá!

Allt í einu var svo búið að fara í viðtal á RÚV, í lok júlí, og tilkynna stofnun miðils á haustmánuðum.

Sagan af naglasúpunni hefur sannað gildi sitt þessa mánuði sem liðnir eru frá þessum sólríka en ögn vindasama degi. 

Strax eftir tilkynninguna byrjuðu þorpsbúar að tékka á pottinum og fyrstur til að demba sér í hugmyndavinnu með okkur var Hörður Ágústsson, þekktur sem stofnandi Maclands, og gjörkunnugur því að spreyta sig í ævintýramennsku. Eins og konan hans, grafíski hönnuðurinn Svala Hjörleifsdóttir, sem á sínum tíma stofnaði fyrirtækið með honum, en dembdi sér nú í að hanna vef fyrir Gímaldið. Hjónakornin stráðu sínu töfradufti í súpuna. Ekki leið á löngu þar til nýr þorpsbúi lét á sér kræla: Georg Gylfason en hann er lausapenni á nýja miðlinum. 

Georg hefur, þrátt fyrir ungan aldur, starfað sem blaðamaður bæði á Fréttablaðinu og Heimildinni en hann lærði við og útskrifaðist úr The London School of Economics and Political Science. 

Sérstaða Georgs eru greiningar, auk þess sem hann býr yfir svo notalegri útvarpsrödd að hann mun líka hafa umsjón með hlaðvarpinu Sirkabát ásamt Brynjólfi Gauta Guðrúnar Jónssyni. Nánar um það í annarri frétt.

Með tilkomu þessa fólks bættist aldeilis næring í súpuna og þá ekki síður þegar í ljós kom að Aðalheiður Ámundadóttir, blaðamaður, lögfræðingur og fyrrum fréttastjóri Fréttablaðsins, væri líka til í að starfa undir hatti Gímaldsins. 

Viðburðir og umfjöllun í áskrift

Í hugmyndavinnu síðustu mánaða varð fljótlega ljóst að gáfulegast væri að stofna áskriftamiðil. Miðil sem gæti sérhæft sig í dýpri greiningum á þörfum málum. Hugmyndin er að þar gefist andrými til að skoða ýmislegt sem oft gefst ekki ráðrúm til í hröðum fréttaflutningi hversdagsins. Þá verður búinn til vettvangur fyrir fólk til að taka þátt í umræðu utan samfélagsmiðlanna, auglitis til auglitis, á reglulegum viðburðum á vegum Gímaldsins. 

Að sama skapi verður lögð áhersla á menningu. Bókaklúbburinn Bókapressan verður starfræktur á vegum Gímaldsins og þar gefst fólki einnig tækifæri til að vera þátttakendur, bæði í gegnum klúbbinn, á viðburðum og í gegnum hlaðvarp undir sama nafni. Raunar bættist sjöundi súpugerðarmaðurinn í hópinn: Kristján Hafþórsson sem verður annar umsjónarmanna Bókapressunnar og viðburða á vegum hennar, ásamt Auði. Kristján er stjórnandi hlaðvarpsins Jákastið, fyrirlesari og meistaranemi við Háskóla Íslands. Hann er jákvæður með eindæmum og sér glas lífsins hálffullt. 

Segja má að Gímaldið verði stílað inn á safaríkar sögur, hvort sem þær birtast í formi greininga, viðtala eða í bókum. Strax í upphafi varð ljóst að það væri markmið í sjálfu sér að stofna miðil sem veitti næringu eins og súpa, jafnframt því að vera fréttadrifinn, nú á tímum vaxandi fréttaforðunar. Nokkuð sem verður spennandi að prófa – og þróa. 

Við hlökkum til að lifa og skrifa þessa sögu með ykkur – þennan fjölmiðil okkar allra.