Gímaldið hrökk í gang 30. október síðastliðinn og viðbrögðin hafa satt að segja farið langt fram úr vonum. Sex dagar í loftinu og margt búið að gerast. Í gær upplifðum við það að vefurinn okkar þoldi ekki álagið og við duttum úr loftinu í einhverjar mínútur. Þetta var þó lagað í snarhasti og netþjónn sem hýsti Gímaldið hefur verið stækkaður til að minnka líkur á að staðan komi upp aftur. Við greinilega litum ekki nógu stórt á okkur!

Gímaldið er fjölmiðill í mótun. Eftir því sem staflinn af birtu efni verður hærri verður karakter miðilsins greinilegri. Við viljum birta greiningar, fréttaskýringar og hlaðvörp, en reyna að tapa ekki gleðinni og leyfa okkur að vera skemmtileg líka. Oft mun okkur takast vel til en svo verðum við eflaust mistæk eins og gengur og birtum inn á milli eitthvað sem enginn nennir að lesa eða hlusta á. Þá er líka í góðu lagi að áskrifendur láti okkur heyra það. 

Fjölmiðlar hafa víðtækt hlutverk í samfélaginu og það er eðlilegt að almenningur fylgist vel með þeim og hafi á þeim skoðun. Þannig á það að vera. Verst er fyrir fjölmiðil ef öllum er sama um hann, þá fyrst er ástæða til að hafa áhyggjur. 

Nýr fjölmiðill er ekki settur í loftið til höfuðs öðrum fjölmiðlum. Þvert á móti lítum við svo á að með okkar framtaki séum við að bætast „á vaktina“ og stuðla að enn öflugri umfjöllun um innlend og erlend málefni. Meiri breidd, meira efni á íslensku, fleiri blaðamenn að störfum – vonandi öllum til heilla. Okkur dreymir um að efla samtal, skýra út og dýpka umræðuna. Hvernig okkur tekst upp verður tíminn að leiða í ljós. Okkur langar að gera meira fyrir áskrifendur, meðal annars auka framboð af hljóðefni, þannig að hægt sé að hlusta á greinar með þægilegum hætti. Við reynum að taka einn dag í einu og bæta framboð efnis jafnt og þétt.

Í dag er sjöundi starfsdagur Gímaldsins. Við erum búin að fjalla um stjórnmál, tungumálið, lýðheilsu, bækur og sitthvað fleira á þessum fyrstu dögum. Tvö hlaðvörp eru farin af stað og það þriðja fer senn í loftið. Bókapressan verður miðstöðu umfjöllunar um bækur hjá Gímaldinu og þátturinn Sirkabát fer senn af stað en í honum verður rýnt í tölurnar á bak við fyrirsagnirnar.

Fréttabréf Gímaldsins eru líka í mótun og á næstu vikum langar mikið til að fara að hitta áskrifendur. Til þess að svo megi verða er líklega réttast að við bjóðum í heimsókn. Við auglýsum fyrsta viðburð Gímaldsins innan fárra daga og vonumst til að umræðukvöld af ýmsu tagi geti orðið mikilvægur hluti af starfseminni. 

Efni Gímaldsins er fyrir áskrifendur. Fjölmiðlar þurfa víst fé til að geta lifað, og við keppumst nú við að byggja upp sterkan tekjugrunn með því að hvetja fólk til að gerast áskrifendur að nýfæddum fjölmiðli. Í sameiningu komum við ferskum fjölmiðli á legg.

Takk áskrifendur, þið eruð hetjurnar okkar. Áfram og upp!