Helga Arnardóttir er gengin til liðs við Gímaldið og tekur þátt í Evrópusambands umfjöllun miðilsins í sumar. Hennar fyrsta verk er að fjalla ítarlega um hátt matarverð á Íslandi, ástæður þess og hver áhrifin yrðu við mögulega aðild að Evrópusambandinu. Þá hyggst hún einnig fjalla um aðra málaflokka svo sem neytendamál, heilsu og fleira. 

Helga hefur verið unnið sem sjálfstæður kvikmyndaframleiðandi, handritshöfundur og dagskrárgerðarmaður fyrir RÚV, Sýn og Sjónvarp Símans undanfarin ár. Hún hefur framleitt þrjár kvikmyndir, barna- og fjölskyldumyndina Birtu, spennumyndina Víkina og sálfræðitryllinn Röskun eftir Braga Þór Hinriksson sem frumsýnd var í byrjun þessa árs. Auk þess skrifaði hún kvikmyndahandritið að Birtu og Röskun. Þar fyrir utan vann Helga sjónvarpsþáttaraðirnar Lifum lengur fyrir Sjónvarp Símans og nú síðast sjónvarpsþáttaröðina Blóðbönd sem sýnd var á Sýn fyrir áramót við miklar vinsældir.  

Helga hefur starfað sem frétta- og dagskrárgerðarmaður á Fréttastofu RÚV og  í Kastljósi. Hún starfaði einnig um árabil á Fréttastofu Stöðvar 2 sem fréttamaður og dagskrárgerðarmaður og hlaut Blaðamannaverðlaun Íslands fyrir umfjöllun ársins 2011 fyrir umfjöllun sína um Guðmundar – og Geirfinnsmálið.  Hún er með meistaragráðu í International Journalism frá City University of London og BA – gráðu í stjórnmálafræði og frönsku frá Háskóla Íslands.