Í nýjasta hlaðvarpsþætti Gímaldsins fara Eyrún Magnúsdóttir og Aðalheiður Ámundadóttir yfir fréttir vikunnar. Til umfjöllunar eru meðal annars fyrstu hagræðingaraðgerðir nýs meirihluta í Reykjavík og tíu ára afmæli Brexit og hvað íslensku já- og nei-hreyfingarnar geta lært af aðdraganda atkvæðagreiðslunnar í Bretlandi fyrir 10 árum.

Hagræðing hjá nýjum meirihluta

Þátturinn hefst í Ráðhúsinu, þar sem nýr borgarstjóri, Hildur Björnsdóttir, er tekin til við þá „tiltekt“ sem lofað var í aðdraganda kosninga. Búið er að segja átján manns upp störfum og tvær skrifstofur af fimm lagðar niður. Af þeim átján sem misstu vinnuna voru fjórtán konur. Auk þess að leggja mannréttindaskrifstofuna niður var nánast öllum sagt upp á skrifstofu og viðburða, þar sem nánast öllum var sagt upp, þar á meðal sex upplýsingafulltrúum og einum samskiptastjóra.

Í þættinum er velt upp spurningum um hvað taki við í upplýsingamálum borgarinnar, hvort upplýsingamiðlun til borgarbúa verði útvistað til auglýsingastofa og hvort búast megi við “labba og tala” myndböndum á samfélagsmiðlum.

Brexit á röngunni

Frá Ráðhúsinu liggur leiðin í Downingstræti 10. Keir Starmer er sjötti forsætisráðherra sem sagt hefur af sér frá þjóðaratkvæðagreiðslu þeirra Breta um Brexit. Í þættinum er farið yfir áherslur með og á móti hreyfinga Breta í aðdraganda atkvæðagreiðslunnar og hvort í þeim leynist lærdómar fyrir stríðandi fylkingar á Íslandi.  

Í Bretlandi börðust andstæðingar ESB fyrir breytingum en aðildarsinnar vörðu óbreytt ástand með hræðsluáróðri. Á Íslandi snýst þetta við, þar sem Evrópusinnar boða breytingar en andstæðingar aðildar þurfa að verja óbreytt ástand.

Þessu tengt:

24. júní 2026

Að verja óbreytt ástand eða bjóða upp á breytingar: Lærdómur Brexit fyrir Já og Nei hreyfingar Íslands

Þá benda greiningar í Bretlandi til þess Bretar hafi ekki eingöngu beitt hörðu hagsmunamati í kjörklefanum, heldur hafi þeir líka leyft tilfinningum að ráða. Í þættinum er rætt um hvort aðildarsinnar á Íslandi þurfi að taka þetta taka til sín og gangast betur við því að vera Evrópusinnar.

Nýr blaðamaður til liðs við Gímaldið

Þátturinn kynnir einnig nýja liðskonu Gímaldsins, Helgu Arnardóttur, reynda fjölmiðlakonu sem starfað hefur lengi við fréttir og dagskrárgerð.

Þessu tengt:

24. júní 2026

Helga Arnardóttir til liðs við Gímaldið

Helga reið á vaðið í vikunni með þátt um eitt helsta hagsmunamál íslenskra heimila: matvöruverð, sem er svo hátt í evrópskum samanburði að hin háu íslensku laun duga ekki til að skýra muninn.

Helga leitar svara hjá stéttarfélögum, Neytendasamtökunum og Samkeppniseftirlitinu, en forstjóri þess gagnrýnir að samkeppni á matvörumarkaði snúist of lítið um verð og meira um útlit verslana og fjölda afgreiðslukassa.

Þessu tengt:

24. júní 2026

„Ég held að samfélagið hafi klikkað“ – Matvöruverð í hæstu hæðum á meðan matvörurisar hagnast

Stjórnsýsluúttekt á Græna gímaldinu

Að lokum er vikið að stjórnsýsluúttekt á skipulagsferli Græna gímaldsins, sem birt var í síðustu viku. Bent er á tengsl úttektarinnar við nýlegar uppsagnir á skrifstofu borgarstjóra. Þegar Sjálfstæðisflokkurinn, undir forystu Hildar Björnsdóttur, lagði til úttektina í janúar 2025 var hún harðorð í garð þáverandi borgarstjóra, Einars Þorsteinssonar, og sagði í viðtali á Bylgjunni: „Ég lít svo á að þetta klúður hafi átt sér stað á skrifstofu borgarstjóra.“

Þessu tengt:

18. apríl 2026

Sagan á bak við umsögnina um Græna gímaldið sem ekki mátti birta

Nú beinist tiltekt Hildar einmitt að þeirri skrifstofu. Athygli vekur að hvorki minnihluti né meirihluti kjósa að ræða skýrsluna, enda situr Hildur nú í meirihluta með bæði Einari og Björgu, fyrrverandi aðstoðarmanni borgarstjóra. Enginn virðist lengur hafa hag af því að halda málinu á lofti.

Hægt er að hlusta á þáttinn í spilaranum hér að ofan og á öllum helstu hlaðvarpsveitum.