Meta, eigandi Facebook, Instagram og Whatsapp, tilkynnti í apríl að fyrirtækið hygðist segja upp 8.000 manns og nú í vikunni hófst sú hrina uppsagna. Fyrirtækið er með 78.000 starfsmenn víða um heim. Auk uppsagnanna verða gerðar miklar breytingar á störfum um 7.000 starfsmanna en verkefni þeirra verða færð meira yfir í þróun fyrirtækisins á gervigreind.    

Undanfarnar vikur hafa verið róstursamar innan Meta-samstæðunnar, einmitt vegna þessarar þróunarstarfsemi. Meta setti af stað innra verkfæri sem það kallar Model Capability Initiative (MCI) á tölvur starfsmanna sem eru staðsettir í Bandaríkjunum. Þessi hugbúnaður gerir yfirmönnum kleift að fylgjast með músahreyfingum, smellum, hraða innsláttar og taka regluleg skjáskot af tölvuskjám starfsmanna. 

Yfirmenn Meta segja tilganginn með þessu að þjálfa líkön fyrir gervigreind. Starfsfólk hefur ekki val um hvort þessi hugbúnaður er settur upp, heldur er það einfaldlega krafa stjórnenda hjá Meta að starfsfólk taki þátt í gervigreindarþróun fyrirtækisins með þessum hætti. Yfirmenn hafa líka fullyrt að gögn um starfsfólk og vinnu þess verði ekki notuð til að meta afköst heldur sé þetta aðeins í þágu þróunar á gervigreind. 

Starfsfólk hefur mótmælt þessum aðferðum fyrirtækisins og meðal annars dreift bæklingum á salernum og sjálfsölum á vinnustaðnum og safnað undirskriftum gegn þeim. Á undirskriftasíðunni er birt yfirlýsing þar sem segir meðal annars: 

Það ætti ekki að vera viðtekin venja að fyrirtækjum, óháð stærð, sé heimilt að arðræna starfsfólk sitt með því að safna gögnum þess án samþykkis í þeim tilgangi að þjálfa gervigreind. Gervigreind sem ætlað er að þjóna og styrkja fólk getur ekki gert það á sama tíma og hún hunsar eða virðir ekki samþykki fólksins sem hún segist þjóna.

Alls hafa um 1.500 starfsmenn Meta skrifað undir mótmælin og krefjast þess að hugbúnaðurinn, sem gerir Meta kleift að fylgjast með hverri hreyfingu þeirra við tölvuskjáinn, verði tekinn úr notkun hjá fyrirtækinu. Þessi mótmæli fara fram á sama tíma og Meta er upptekið við uppsagnir þúsunda starfsmanna og endurskilgreiningu fjölda starfa í þágu gervigreindar. 

Stillt upp við vegg

Starfsmenn hafa lýst þessu eftirliti Meta í þágu þess að þjálfa gervigreind sem dystópísku. Þarna sé í raun verið að stilla starfsfólki upp við vegg og þvinga það til að þjálfa gervigreindarerindreka, sem síðan muni taka störf þeirra. Meta hefur boðað frekari uppsagnir á síðari hluta ársins, sem hefur enn frekar kynt undir ólgu á vinnustöðum fyrirtækisins.

Mark Zuckerberg og aðrir forvígismenn Meta hafa reynt að tala starfsfólk upp með því að segja að það sé best fyrir gervigreindarlíkönin að læra af þeim bestu. Fylgjast þurfi með vinnulagi besta og klárasta fólksins til að byggja góð þjálfunargögn fyrir gervigreind. Starfsfólk Meta sé einfaldlega svo klárt að það sé besta uppspretta sem gervigreindarerindrekar geti hugsað sér. Verktakar séu ekki eins góðir í þetta verkefni. 

Verkfærið er enn sem komið er aðeins notað í Bandaríkjunum en í Evrópu er óvíst hvort slíkt eftirlit myndi samræmast vinnulöggjöf. 

Meta hefur áform um að fjárfesta í gervigreindarþróun fyrir um 135 milljarða bandaríkjadala á þessu ári, um tvöfalt meira en á síðasta ári.